Ny rekord for misjonsløp

Lundeneset sprang inn 1,2 millionar til Mongolia!

– Dette er enormt stort, eg vil berre uttrykke ei stor takk! Takk for at alle dykk har vore med å bidra. Tenk at ein gjeng med ungdommar på ein skule i vesle Ølensvåg kan gjera så mykje. Dette flotte resultatet vil bli til stor velsigning for dei som får midlane. Og så er det viktig å understreka at det handlar verken om store beløp, eller å slå tidlegare rekordar. Det handlar om kva Gud kan bruka desse pengane til. Dette sa prosjektsjef i russen, Naomi Joy Leask, då ho presenterte resultatet.

Misjonsløpet på Lundeneset er eit av dei faste innslaga når skuleåret og hausten for alvor er i gang. Ein torsdag i slutten av oktober samla rundt 160 påmelde elevar og andre inn 1.237.831 kroner til russen sitt prosjekt i Mongolia. Pengane kjem inn ved at løparane skaffar sponsorar som støttar med rundebeløp eller fastbeløp.

Innsamlingsbeløpet er det sponsorane har lova per dags dato, som dei neste vekene vil bli betalt inn på russen sin innsamlingskonto. Fleire elevar samla inn over 10.000 kroner kvar.

Dei spreke løparane sprang ei løype som er 600 meter, og løpet varte i halvannan time. Den eleven som sprang mest, sprang 36 rundar, altså rett over distansen for eit halvmaraton.

Pengane som elevar og støttespelarar samlar inn, går til Misjonssambandet sitt arbeid i Mongolia. Her støttar russen blant anna arbeid blant barn med funksjonsnedsetjingar, aktivitetar til barn og unge, arbeid i den lokale kyrkja og samfunnsutvikling.