Innovasjon, berekraft og Lundeneset i 2040

JoinUp – ein app som skal gjera det enklare å finna fellesskap når ein skal trena eller vera fysisk aktiv, stakk av med ein av førsteplassane i årets innovasjonscamp på Lundeneset.

1 2 ►

Det har blitt nokså innarbeidd at andre veka etter nyttår er sett av til innovasjonscamp på Lundeneset. Då legg ein vekk den vanlege timeplanen dei fleste dagane, og jobbar i grupper med å løysa ei problemstilling som Vår Energi og Ungt Entreprenørskap (UE) Rogaland står bak. Dette året kunne elevane også tenka kreativt om korleis Lundeneset skal sjå ut i framtida, når det nye tomteområdet nord for skulen er teke i bruk.

Veka starta med kick-off for alle grupper. Då var Tom Sjøen frå Ungt Entreprenørskap Rogaland spesielt invitert til å sparka det heile i gang, spreia inspirasjon og innovasjonsiver.

Dersom mange tenker, så må det dukka opp gode idear. Kanskje mange gode idear. Tysdag denne veka var alle dei godt over 40 gruppene godt i gang med å utvikla sine idear og produkt. Rundt om på borda i klasseromma har det vore god stemning og positiv vilje til å dela idear og tankar. Alle på gruppa deler idear, og i startfasen skal ingen idear forkastast. Vidare må gruppene skaffa seg kunnskap om problemet dei har valt, og gjerne kombinera idear og laga nye.

I løpet av veka er det også tid til føredrag og inspirasjon i møtesalen. I år fekk elevane møta tidlegare elev Sofie Arnesen Hodne som driv for seg sjølv innan foto og filmproduksjon. 25-åringen, som har base i Oslo, snakka glødande om korleis ein kan gjera levebrød av hobbyen sin. Det er viktig å ikkje la andre ta iveren frå deg, og det er faktisk ikkje så vanskeleg å gjennomføra som ein skulle tru, meiner Sofie.

Ein annan som snakka til elevane, var Basile Lacave. Han er gründer, og står bak eit produkt som er unikt i Noreg: Vegansk, økologisk ost som er laga av cashewnøtter.

Siste dag av innovasjonscampen blei ideane presentert for eit panel frå næringslivet, med superfinale i møtesalen. To av dei ti beste bidraga av dei som har valt Vår Energi si problemstilling, går vidare til finale i Stavanger seinare i vinter.