Innovasjonscamp og folkehelse

Tysdag gjekk startskuddet for årets innovasjonscamp på Lundeneset, eit tverrfagleg undervisningsopplegg som blir gjennomført kvar vinter. Då legg ein vekk den vanlege timeplanen, og jobbar i grupper med å løysa ei problemstilling. I år er temaet folkehelse og livsmeistring, og problemstillinga: Korleis kan ein styrke ungdommar si psykiske og fysiske helse i Vindafjord – gjennom tiltak frå skulen, kommunen og frivillige fellesskap.

Ideen bak er at dersom mange tenker i lag, dukkar det opp gode idear. Tysdag denne veka var alle dei godt over 40 gruppene godt i gang med å utvikla sine idear. Rundt om på borda i klasseromma har det vore god stemning og positiv vilje til å dela idear og tankar. Alle på gruppa deler idear, og i startfasen skal ingen idear forkastast. Vidare må gruppene skaffa seg kunnskap om problemet dei har valt, og gjerne kombinera idear og laga nye.

I løpet av veka er det også tid til føredrag og inspirasjon i møtesalen. I år fekk elevane møta Oddvar Vignes, som snakka om venskap, einsemd og utanforskap.

Siste dag av innovasjonscampen skal ideeane presenterast for eit panel frå næringslivet, med superfinale i møtesalen. 

Her er nokre glimt frå teambuildinga  i starten av opplegget.