Ny skulekvardag

– Det eg saknar mest, er det sosiale, fortel Faith Simae Tvenning. Engelsk står for tur på timeplanen hennar, og ho ventar på at læraren skal fortelja opplegget for timane.

Torsdag fekk Lundenes-elevane, til liks med alle andre elevar i landet, beskjed om at skulen ville vera stengt dei neste vekene. Etter sjuende time pakka dei sakene sine og reiste heim.

Denne veka har timane blitt organisert som fjernundervisning, i stor grad i form av blant anna videokonferansar og arbeidsoppgåver. Vurderingar som skrivedagar, prøvar og innleveringar går stort sett som normalt. Arbeidsinnsatsen har vore god, både hos elevar og lærarar.

Elevane gir tilbakemedling på at det fungerer fint, men er også litt stressande. 

– Det har gått bra så langt, men eg saknar dei faste rutinane. Det kan vera vanskeleg å følga med og få med seg alt, seier VG2-elev Einar Moen.

Marius Svellingen fortel at elevane har god kontakt seg i mellom medan alle er på forskjellige stader: 

– Mange har teke i bruk ein app som gjer det lett for mange å møtast samtidig, seier Marius.

Så står det att å sjå kor lenge denne unntakstilstanden varer på Lundeneset.