Fråværet går ned

Hausten 2016 vart det innført ei ny fråværsgrense som går ut på at dersom ein elev har meir enn 10 prosent udokumentert fråvær i timane i eit fag, vil han eller ho som hovudregel ikkje ha rett til å få halvårsvurdering med karakter eller standpunktkarakter i faget. Statistikken frå Udir viser fråvær for dei tre siste skuleåra, og trenden er klar: Både på landsbasis, i Rogaland og ved Lundeneset har fråværstala gått ned.

I snitt hadde elevane ved Lundeneset 3 dagar og 3 timar fråvær skuleåret 2016/2017, medan tilsvarande tal for året før var 3 dagar og 4 timar. Landsgjennomsnittet var 3 dagar og 9 timar (2016/2017) og 5 dagar og 12 timar (2015/2016). Statisikken viser medianen for fråvær ført på vitnemålet, som vil seie den midterste verdien når fråværet blir sett opp i synkande eller stigande rekkefølge.

– Generelt har vi hatt lite fråvær ved Lundeneset, men vi er sjølvsagt glade for at timefråværet har gått endå meir ned, seier undervisningsleiar Arlene Pedersen.

Her kan du sjå heile statistikken:

https://statistikkportalen.udir.no/vgs/Pages/Fravaer-paa-vitnemaalet.aspx