Dugnad på sitt beste

– I år blei me 50 deltakarar, det er ny rekord, opplyser Arne Voll, driftsleiar på Lundeneset

I løpet av den nydelege vårdagen blei det malt terrassar og internatbygg, benkar blei snekra, og ny og frisk bark blei lagt i dei mange blomsterbeda.

- Me fekk også saga ned ein del tre bak 400-internatet før entreprenørar går i gang med sprenging, seier Voll. Det er i dette området utvidinga av Lundeneset snart tar til.

– Generelt var det veldig god stemning og god innsats på dugnadsdagen. Kjøkkengjengen sørga for veldig god mat både torsdag og fredag.

Lundeneset ønsker å retta ein stor takk til alle som deltok på dugnaden fredag. Dette er ein viktig dag for det jamlege vedlikehaldsarbeidet på skuleområdet.

Dekket på kunstgrasbanen blei også skifta ut denne dagen, etter å ha gjort jobben i meir enn 20 år. No ligg banen brakk, og ventar på nytt og meir miljøvenleg kunstgrasdekke.