Rekordinnsamling av Lundenesrussen

Gjennom blant anna misjonsløp, basar, kiosksal og Lundeneset sin eigen Premier League har inntektene auka jamt og trutt i løpet av skuleåret.

― Dette har me all grunn til å vera stolte over. Her har alle vore med og bidratt, sa prosjektansvarleg i russen, Simen Stensland, på avslutningsfesten til VG3.

I Aust-Afrika støttar russen blant anna prosjekt innan evangelisering og bistand, i regi av Misjonssambandet. Meir konkret handlar dette om økonomisk støtte til utdanning for jenter, mediearbeid, og bygging av vass-sisterner i landsbyar. Til saman 1,2 millionar av innsamlingsbeløpet går til desse landa.

― Me ønsker også å takka Lundeneset som har vore til stor hjelp med å leggja til rette for oss dette skuleåret. Derfor vil me gi 140.000 tilbake til skulen, som er øyremerkt møteverksemd og friluftsområde, sa prosjektsjefen.

Foto: Lundenesrussen med sjekkar både til Misjonssambandet sitt arbeid i Kenya og Tanzania, og til Lundeneset. F.v.: Lars Stensland (representant for Misjonssambandet), Simen Stensland (prosjektansvarleg, russen), Karl Martin Nord-Varhaug (russepresident) og Gustav Løge Fosse (rektor, Lundeneset) Foto: Kees A. Z. Fjellvang.