Fleire søker Lundeneset

Undervisningsleiar Arlene Pedersen gler seg over gode søkartal (Foto: Fredrik B. Sunnhordvik)

Tala viser oppgang i søkinga til Lundeneset. Totalt har 301 ungdomar søkt skuleplass til hausten.

VG1 har totalt 152 søkarar.

— Auken er veldig tydeleg når det gjeld VG1 studiespesialisering, her er det 93 førsteprioritetssøkarar. Me må heilt tilbake til 2015 for å finna liknande tal, opplyser undervisningsleiar Arlene Pedersen.

Totalt er det i underkant av 70 skuleplassar på VG1, fordelt på IT og medieproduksjon, sal, service og reiseliv, og studiespesialisering.

Det totale søkartalet pr. 8. mars er 301. Samanlikna med dei siste par åra er også dette gode tal, og om lag på same nivå som i 2018.

Også til VG2 er søkinga god, men skulen oppmodar likevel fleire til å søka. Det same gjeld VG3 påbygg, der enkelte søkarar ofte er usikre. Tidlegare års erfaring viser at det kan bli ledige plassar utover våren.

Framleis mogleg å søka

Måndag etter vinterferien starta utsending av svarbrev til søkarane. Alle som har søkt innan fristen kan forventa å få svar før 20. mars. Nokre vil få tilbod om plass, medan andre hamnar på venteliste. 

Svarfristen er sett til 31. mars. Etter at skulen har fått inn alle svara frå førsteinntaket, vil det bli sendt ut nye inntaksbrev til søkarar.

— Vidare utover våren er opptaket fortløpande, så det er framleis mogleg å søka skuleplass, understrekar Arlene Pedersen.